Reynel M. Ignacio is a poet, visual artist, and cultural educator based in Catarman, Northern Samar. A graduate of BSEd major in Biology, he also holds a Graduate Diploma in Cultural Education from Northwest Samar State University, where he was a scholar of the National Commission for Culture and the Arts (NCCA). He has been a fellow of the Lamiraw Creative Writing Workshop and the Iligan National Writers Workshop. His poems appear in Memories of Water, Pinili and the UBOD New Authors Series. He is a recipient of the Gawad Komisyon sa Wikang Filipino, Gawad Bienvenido Lumbera, Jimmy Balacuit Literary Awards, and Chito S. Roño Literary Awards. He is also a proud member of KATIG Writers Network, Inc., an organization of writers from Eastern Visayas.
Nakadto la gihapon an banig san pag-uli ko sa balay. Kanda Lola Bara. Nakalikid sa ligid. Ginhahangkupan an iya kalugaringon. Dinhi una nga iginlara an akon mga inop. Ngani, bisan nga nakapalit na si mama kutson, nabalik gud ak paghigda dinhi. Naruruyagan ko an pagragutok san banig sa akon taludtod kun nagliligad-ligad ak. Sa pagmata, nadikit sa akon lawas an mga kwadrado nga sugad san ginhingluan. Sanglit kun nakakauli ak ngani, karuyag ko ini utro katurugan.
Nagrarayhak an mga tapotapo san akon gintakyab an banig. Ngan sa akon paghigda, waray gud ngay-an sini hingalimti an akon mga pangandoy. Banig nga ginparig-on san akon ihi, san akon luha, ngan san angtod sa kakurulpon san ginpipirit ak pakaturugon ni Lola Bara. Aanhi la nasuksuk sa mga ginpahutan an mga pulong nga waray ko igyakan, ngan pag-inantos nga nahingaturugan. Nag-iinisturyahon ini sa akon, ngan an akon lawas sugad nga iginlalara pakig-usa san mga handumanan. Totoo, nahingaturog ak. Halarom nga katurog. Katurog nga maiha na gin-uungara san akon hunahuna.
Nahingamata ak san pagkarasikas san mga nagkatastas sa ligid san banig. Mabug-at na gud man yana an akon mga inop. Nalilisang an mga tikog san pagpahot. Ginbalik ko sa ginpahutan ini nga mga nagkatastas. Naabuyon sa kun diin ko siya karuyag igsuksok. Maaram ini nga banwa nga iglalara siya. Naamyon ko la gihapon an tuna kun diin ini pantabasa antis pa man mahibaro kun paanano mahimo nga pahuwayan.