gibaligya og tag 1500 
sa nahabiling pamilya niini
ang kada usa sa 20 ka sunoy 
nga iyang hiniktan. 
Gilat- an nila  og hurot
ang mga buhi nga bisayang mga manok. 
Giihaw ang duha ka baboy nga binuhi—
Ang usa gilapa, ang usa gi-asal.
Nagkumbira, nagsadya—
Ang ilang mga dughan nga nagngulngol. 
Aron dili na kuno sila mahasol 
sa paglawog o  magsakit sa paghandom 
sa mga buntag nga dili na 
makalitok sa ngalan
sa mitaliwan.

buntag sa usa ka asymptomatic

Sa pagtuktogaok sa mga sunoy, 
Madungog pod ang agulo sa mga iro. 
Sa pagkanaog sa mga umagak sa ilang 
Gibatogang mangga, moduyog pod 
Pagsakdap-sakdap ang mga kwaknit. 
Sa pag-ikid-ikid sa mga itik 
Sa yutikon nga lapok ang mga baki 
Ug pakra magsugod pod 
Sa ilahang litanya. Sa pagkanta-kanta 
Sa mga tamsi ibabaw sa tambis, taghoy- 
Taghoyan sila sa mga siloy 
Nga gatugdon sa atis. 
Sa pagtuyok-tuyok sa mga pati 
Sa lapad nga wanang, 
Ang kukok mosugod na pod 
Og kurokok sa kawayanan. 
Ug ako, dia sa akong kwarto, galukob 
Sa habol nga namungingi sa laway 
Sa kalisang, naglantaw-lantaw 
Sa grasya sa maayong buntag.

Kudkoran

Sa una, mag-atang gyod ko kon magluto 
si mama og biko o dili ba kaha budbod.
Basta magsugod na gali si Papa og
kagod sa lubi, muangkas gyod dayon
ko sa kudkoran. Mulingkod sa iyang luyo 
dayog gakos sa iyang hawak.
unya muhuwat nga muingon si papa,
"Nak, gunit pag-ayo ha, kay manlarga nata." 

Karon, nagsigi gihapon og luto si mama 
og budbod ug biko. Nakat-on napod ko
unsaon pagkagod sa lubi. Apan, wala na 
ang kudkoran.Wala nakoy maangkasan.
 Magaksan.

Sukad atong miingon si papa, 
"Nak, gunit og pag-ayo ha, 
dili na baya magdugay si Papa."