tea solon enjoys drinking coconut water any given day. She posts translations of life from her lens and sense on Butung is Layp (Coconut is Life), the blog she owns. Her collaboration with family and friends produced three books: Palwa (2023), her first collection of poetry; Solon Descendants: Poetry and Creative Expressions from 3 Generations (2022); Dew of My Memories: Collection of Poetry in Cebuano and English (2022). Her pieces are in poetry book anthologies: Literary Revelations Publishing House's bestsellers Tranquilit: An Anthology of Haiku (2025) and Petals of Haiku: An Anthology (2024); Dagat ug Kinabuhi: Translating Contemporary Cebuano Poetry (2022). tea's Cebuano Visayan poems have found a home on the pages of Kabisdak, and her English poems have appeared in Gobblers by Masticadores and Spillwords, among others.
kagumkom nga lanog ug hilom
kagumkom ang tamak sa atoang mga tiil dinhi sa alpombrang gigama sa mga nangalarag nga dahong laya. uban sa mga lakang ang nangaging mga gutlo sa atong kuptanay. kani nga tunob—nangaon ta og pancit sa visayan, nag-usap tunga sa hilom, hinayhinay napanas ang kagutom, ayha natagamtam ang katam-is sa imong mga pahiyom. nahinumdoman mo pa ba? kani—gigukod ko nimo sa ulan tunga sa bunok sa atong panaglalis. unsa gani atong giawayan adto? ug kada kagumkom nga tunob giubanan og nagkadaiyang bulok ug silom, atong mga layang dahon: agik-ik, sugsog, katawa, panghupaw, kahilom. ang mga tipak sa kahayag ug anino nagsukod sa dalan sa gisaw-an tang paglakaw. padayon ang atong kuptanay, gikan sa pangalarag padulong sa tingpamulak, ug ang tono sa atong mga tunob lanog nga nag-awit sa gisaw-ang dalan tang gitadlas.
ang akong mga pulong
gikan sa gubat naghigda dili kalihok— nahigot sa higdaanan hinayhinay naglingkod dili kalakaw— nahigot sa wheelchair hinayhinay nagtindog dili kadagan— nahigot sa sungkod hinayhinay naglakaw dili kalahutay— nahigot sa baga hinayhinay nagdagan dili kapaspas— nahigot sa takilpo hinayhinay ang hinayhinay akong hinayhinay mga hinayhinay pulong hinayhinay hinayhinay naayo.
ako ang tingog sa akong inahan
ug mga henerasyon sa daghang inahan nauna pa kaniya kababayen-an kansa ining kalibotan gipatak-om akong mga pulong nagkurog sa kapungot gikan sa kinahiladman sa akong mga gamot nga nagtambol sa yuta ubos nako latas sa lira sa mga gusok nga nagpatukar sa sulod hangtod sa mga kalalaw nga nag-awit sa ibabaw akong gipas-an ang gibug-aton sa ilahang pagtak-om giyamyam ginadiling mga awog gibuhian nagtingkagol nga mga awit gipalingkawas gikadenang mga sugilanon gakabiba sa gibug-aton sa kahilom akong mga pulong mokanukay nga walay kaikog mohurat og mga anino mopulpog og mga natukod nga paril ako ang mga henerasyon sa mga inahan nakigkumbati