Ronan R. Lingatong is a member of the Baybay Writers Collective and a fellow at the IYAS La Salle National Writers' Workshop. His work has appeared in Bulawan Literary Journal of Northern Mindanao, Kabisdak Literary Lighthouse, Katitikan: Literary Journal of the Philippine South, Manila Bulletin’s Bisaya Magazine, and Superbalita Cebu.
Duut Sa Barunday
Inig hapak sa lalay nga kamot sa hanging dumagsa. Mapusgay
ang dagat.
Mokatap ang pagkitiw sa bawod, tugawon ug buk-on ang
kalantap.
Luag nga layag moburot. Guyoron imong bigiw sa pinakalawod
nga bahin
Sa lawod. Sa pinakalawom nga bahin sa lawom. Sa lawod nga walay
gitanom
Nga payaw. Walay saag nga usa ka lugas nga gapnod. Walay usa
ka pungpong
Nga lusay. Mohunong ang pagtayhop niini kon mahitungod ka
sa lawod
Sa usa ka patay nga isla. Kon diin sugaton ka sa pag-ulbo sa mga nokus
nga itom
Og dugo. Gukdon sa wakwak nga Barongoy. Abyan sa barangan
nga Balo.
Ug usa mohalok ang pamawong nga dong sa sakayan ngadto sa abo sa patay
nga isla.
Didto nimo makita ang paggimaw sa nagkilab nga himbis, ug pagwara
sa ikog
Diha sa nagbukal nga dagat ug mabati ang pag-inagik-ik sa nagkumbirang
Kanaway.
Pagsubad
Kagahapon ba, Kanaway, nakita ko ikaw samtang nagpahuway ang luya nga lawas ilawom sa anino sa palo sa payaw. Imo gisarapsarapan ang naglutaw nga plastik, mibutod nga iro, nilabog nga baktin, gipukgo nga sudlanan sa kape’g sabong pawdir. Kahibaw ko nga gikapoy pod ka human sa pipila ka pagsakdap sa kapakyas. Apan usa sa nakapaagbon sa namilit nga asin sa akong panit mao ang imong pagbatog ibabaw sa pungpong nga lusay. Unsay naa niini nga wala sa ubang naglutaw? Naa man unta silay bukobuko, naa man unta silay kalandong. Dihang imong gilili ang daw lilas nga dahon, kon naa bay ikog, naa bay gitagoan nga pagkisaw. Didto! Gisapang sa sungo nimong itom ang gikapoy nga gagmayng Danggit nga naghabol og dahon sa laylay nga lusay.
sisi
namangpang ang hulga sa habagatang panganod, gisugdan og tadtad sa kilat ang gibang sa isla apid, madaldag, mosay-a na usab ang nanglurong lusay, mabungkag usab ang gipundok nga batong bantilis ug tipaka sa gansangong hunasan, magsugod og tubo ang gihay sa sisi diha sa aping sa mga bato, ug masamad ang kubalong tiil ug kamot, mag-uylap-uylap ang mga tudlo inig panginhas