Gayong taga-Quezon City, makatang tubong-Maynila si Angelo V. Suarez. Philippine English: A Novel ang kaniyang huling aklat. Isa rin siyang peasant advocate sa Unyon ng mga Manggagawa sa Agrikultura (UMA) at Sama-samang Artista para sa Kilusang Agraryo (SAKA). Bahagi ng pambansa-demokratikong kilusan, nananawagan ang mga grupong ito ng tunay na reporma sa lupa, soberanya sa pagkain, at pambansang industriyalisasyon.
40 taludtod
Para kay Ka Randy Echanis, lider-anakpawis na pinatay sa 40 saksak sa kaniyang apartment noong Agosto 10, 2020
Binhi ang bawat saksak ang bawat taludtod
Walang hiwaga ang hiwa
Magsubo ng panginoon sa bawat siwang
Sugat sa bukid, hukay sa laman
Sa puntod ng kasama uusbong ang mga kasama
Sanga-sangang kamao
Hindi kasya sa kabaong ang pag-asa
Kislap ng karit sa buwan
Hinahawan ang dilim, nagbabaga ang talim
Pinapanday tayo ng liwanag
Langit ay lupa sa kamay ng magsasaka
Lupang nagkukumot sa mga martir
Lupang kumot ng palay, bala, at apoy
Lupang kinukumutan ng dugo’t dura
Lupang namuong pawis, lupang asin
Lupang nananalaytay sa ugat ng gutom
Lupang artilerya ng pagkai’t minerales
Lupang niyanig ng mga heneral
Lupang hinirang, lupang hinarang, lupang hiniram, lupang hinablot
Lupang abot ng bariles
Lupang ginagalugad ng mga gerilya
Lupang inaagaw ng kaaway, kaya aagaw ang hukbo ng armas
May lumanay ng liryo ang gatilyo
Mulang kanyon ng imperyalismo rumaragasa ang pasismo
Handa tayo, mga kasama
Hawak-kamay kapit-bisig balikat-sa-balikat
Barikada natin ang kasaysayan
Itulak sa sulok ang mga panginoon
Tapyasin sa tatsulok
Paglubog ng buwan sisikat ang demokrasya ng karit
Bago at pambansa
Nakatapak ang industriya sa lupa
Lupang nasa ilalim ng kuko mo, Ka Randy
Lupang uhaw
Lupang tinubuan ng matagalang digmang bayan
Lupang tahanan ng anakpawis
Lupang tuntungan ng sosyalismo
Lupang pula
Pinakamatalas na taludtod ang linyang masa
Rebolusyon ang ating katha
372 ektarya
Sa labas, nababalot sila ng gabi.
Sa loob, gabi ang nababalot natin.
Dito,
walang hindi hagip
ng hininga’t panaginip natin: kislap
ng karit sa putik, suray
ng talong sa tangkay, agak
ng itik sa likod-bahay.
Dito, atin ang lahat
ng hindi atin.
Bukas,
ikaw ang titimbangin ng baboy damo.
Ako ang gagapasin ng palay.
Buga Alab
ng ulap ng boga
ang bala. ang ulan.
Pagputok ng umaga,
ang nagbubungkal ay bubungkalin.
Hindi ba likas sa pag-aaring
lumikas sa pag-aari natin?
Binaklas natin ang bakod
nang itirik natin ang bakod
sa Lupang Ramos.
(372 ektarya ang daigdig.)
Sa Lupang Ramos,
ang madampi ng hangin,
palalayain.
Hangga’t lupa’y dumadanak,
sa dugo tayo tatapak.
Pito sa kada sampung magsasaka ay walang lupa
Pito sa kada sampung lupa ay walang awit Pito sa kada sampung awit ay walang samyo Pito sa kada sampung samyo ay walang luha Pito sa kada sampung luha ay walang salita Pito sa kada sampung salita ay walang kulog Pito sa kada sampung kulog ay walang sugat Pito sa kada sampung sugat ay walang talukap Pito sa kada sampung talukap ay walang bukas Pito sa kada sampung bukas ay walang magsasaka