Isang guro, mamamahayag, at textbook author si Mark Angeles. Ilan sa kaniyang mga tula ay lumabas sa anyong dagli sa kaniyang koleksiyong Ang Huling Emotero na inilimbag ng University of the Philippines Press noong 2021. Noong 2024, inilimbag ng 8Letters ang kaniyang Wasakan ng Puso: Mga Bago at Piling Tula.
Melismata
MANILA — Kailangan ng mahigit 1.17 bilyong piso para ayusin ang mga paaralang sinira ng… Pamulinawen, pusok indengam man Toy umas-asug agrayod’ta sadiam Panunotem man ….Bagyong Karding, ayon sa Kagawaran ng Edukasyon. Sa isang press conference ngayong Biyernes, sinabi ni DepEd spokesperson Atty. Michael Poa na umabot sa 165 paaralan ang nadamay at… Wo ai Beijing Tiananmen Tiananmen shang taiyang sheng Weida lingxiu …386 silid-aralan ang kailangang ayusin. Ginamit ang 561 paaralan bilang evacuation sites… Hey Jude, don’t make it bad. Take a sad song and make it better. …nang manalasa ang Bagyong Karding sa Luzon noong Linggo ng gabi… Fei shang, gao shing, chi, shishyang, Chonghu, Guaja, Jushi, Xijingpin …na kumitil ng 11 buhay.
Pagkawasak
1. Isang linggo pagkatapos, ang palay na pinadapa ng bagyo
ay mangangamoy-alipunga kung hindi gagapasin.
2. Hindi pa siya nakakakita ng bigas na nagdikit-dikit at inaamag.
3. Marunong siyang magpinakbet pero hindi niya bet
magsaing, ni maghugas ng bigas.
4. Pero nagsasalita siya na para bang siyentistang
nakapagpadoble ng mga butil ng ginto sa mga uhay,
nakapagpalit ng turnilyo ng traktora, natuklasan ang sagot
sa climate change.
Balanoy
Tumubo ka sa bungo ng jowa ni Isabella. Lumago ka sa dilig ng kaniyang pagtangis. Buhok ka ni Tulsi, Avatar ni Lakshmi. Namimilipit si Krishna Kapag binali ang iyong sanga. Bulaklak mo’y de-WiFi Na cardiac monitor ni Kudaman. Pampawi ng ligalig Ng kaniyang mga misis. Duklay mo’y nakapakete, Hinarvat ko sa grocery. Panahog ko sa pasta Kapag purga na sa de-lata. Mabuti na lang at itinanim. Ayuda’y tikatik kung dumating.