Haligi

Sang nag-abot ang bagyo 
Natukyab ang balayan 
Gingurisnay sang hangin 
Ang atop nga pawod 
Apang ang haligi nagpabilin 
Nagatindog gihapon sa ulanan 
Wala napukan sang panihol sang hangin 
Nagpakigbato sa pang-os sang lipak. 
Natumba ang lubi sa ingod balay 
Nagtupa sa balayan nga kahoy 
Nagragaak apang nagluhod lang ang halige
Nagatangla sa akig nga langit— nagapakitluoy
Apang ang haligi nagpabilin 
Nagaluhuron sa kabug-at nga ginapas-an
Ang iya pagtuo wala malingkang 
Sang nagangurob nga daguob 
Sang nagapanglambas nga baha.

Batok sa Luyán

Nagisi ang ilok 
sang akon polo uniform,
Gintahi ini nanay.

Nasangit ang akon slacks
sa nagabalikal nga lansang,
Gintukapan ini ni nanay. 

Nawasak ang akon sapatos
sa tuman na kadaan,
Gin-rugbihan ini ni nanay.

Nabugrat ang akon bag
nga ginsubli halin kay manong,
Ginmedyusan ini ni nanay.

Sang indi ako makakuha exam
tungod wala ako nakabayad tuition
Ginbaligya ni nanay ang amon karbaw.   

Sang paggradwar ko sa kolehiyo,
ang toga nga akon ginsuksok,
Ginpanghulman ni nanay.

Pagkatapos ko saka sa stage
Gintalikdan ako ini nanay,
Nagpauli siya sa amon balay. 

Nagtahi Sya sang uniform
Nagtukap sang slacks kag nag-rugby
Sang sapatos para sa amon kinaagot.