Si Alvin Larida ay taga-Surallah, South Cotabato. Naging fellow siya ng 19th San Agustin Writer's Workshop at Tahad: Sox Hiligaynon Workshop para sa kanyang sugilanon. Ang iilan niyang mga akda ay nakakamit na ng Carlos Palanca Memorial Awards for Literature, Dungug Kinaray-a 16, Leoncio Deriada Prize for Poetry and Short Fiction, at Bantugan sa Panulatan sa Kinaray-a.
ICU
Saksi ang langit kag ang mga pispis sa kable kang Marbel kung paano ta ikaw ginhulat samtang pabalik-balik nga ginapanas kang itom nga tuok kang asu kang mga magarot nga traysikol ang imo sitwasyon sa akon hunahuna Indi ko bal-an ang kasakit kang ginsalagsag ang tubo sa imo puwak para ikaw makaginhawa. Nagaisahanon ikaw nga nakipagbatu upod ang ventilator, oxygen tank, kag rosaryo nga aton ginpanumpaan kang first anniversary. Maka-upod ka pa ayhan sa paghigop kang paborito ta nga batchoy sa Popoy’s pagkatapos naton baktason ang mayami nga hangin kang Lake Sebu? Mabatyagan ko pa ayhan ang imo paginhawa nga nagahampak sa akon alipudwan kon ikaw naga-istorya samtang naga-angkas ka sa akon Raider 125 halin sa Marbel hasta sa Surallah sa aton pagpauli sa hapon? Bisan pa ginalunup na kang kagaw ang imo baga, wala ako mahadlok nga kupkupan, kag harkan ka. Kon sarang ko lang.
Ginrara
Madasig gid man siguro maghanaw ang gugma nga ginrara sa Twitter kag Tinder. Biskan maabi-abi ko ikaw nga ginkilala sa tatlo ka bulan, apang kung gabok gid man ang pisi kang akon pagpasiktu sarang gid mabugto kung pabalik-balik nga ginabutong ang sidsidan. Wara gid kaagwanta ang pisi kang aton pagpangamustahanay sugud alas-nuebe tubtub tungang gab-i hasta tabuon kita kang katuyo kag pagpanghuy-ab kang mga korokokok sa wayang. Mayad pa ang T’nalak nga biskan manipis ang pisi kang abaka, gabadlak, mapino nga ginapangtabo ang duag itum, pula, kag puti nga gindihon kang kalipay, kakutoy, kag katuyo kang Tboli. Kung magdayon gid man kita liwan, sa damgo dulang.