Bakâ

Bakâ naman may puwang.
May kiliti sa tamis
ng sorbetes, lalo kung dadampi
sa dila. Hindi lagkit kundi ngiti
ang dulot ng natutunaw na krema sa daliri.
Masarap ipareha ang tinapay na mainit-init
sa ‘sang tasa ng may tamis-pait
na kakaw. Pumapawi sa panunuya
ng maghapong alinsangan.

Bakâ mamangha sa mga bubὀt
ng rosas sa katabing hardin. O maudlot
ang nagbabadyang kulimlim at ulan
kung may kasalong hindi natitiim.
Bakâ nga sumisipol ang hangin,
hindi lamang umiihip
Bakâ naman talagang inuugoy ang mga punò,
at sumasayaw sa saliw ng sipol.
Bakâ may nagsasalimbayang kulay
matitingkad at mapupusyaw, mga balangaw,
hindi nagmimintis ang silip-langit
sa kapirasong pisi ng langit na alay
kung magkahawak-kamay.
o susubuking maghawak ng kamay.

Bakâ naman panaginip
sa idlip ng pagkainip
kayâ naglulubid
ng mga bakâ habang
nakatunghay sa inaalikabok na salamin
ng antigong bintana
dahil walang ibang mapagpilian
kundi magtistis sa gurlis
ng pananabik.

Isang Gabi, Dating Site

Tanggap ko ang bawat mukha, bawat katawan 
na parang kilalang-kilala ko na sila’t
Madalas makasalubong sa madawag na daan.
Walang alinglangan, paglalaanan
Ng espasyo at oras ang kanilang panandaliang
Tingin, mga pahaging, at maging pangungutya
Sa mga tulad kong ang tinig ay tumitinis
At ang mga daliri’y pumipilantik,
banayad na gawing itinatanggi 
Ng mga umaasang sa bawat gabi
Ay may mabibingwit sa makitid
Na sapa ng pag-ibig. 
Heto ako’t naghuhubad ngunit balot na balot
May tinig na nabubusalan
May dunong na tinatalupan ng ibang wika.
Bawat hibla, gaspang ng balat, handang 
Punasin. Marahil, nagbubukas ako
Sa gahiblang haplos
Sa isang dampi ng halik
At sa saglit na pansin
Pagkat mapanglaw na ang ilaw sa silid
Sa apat na sulok kung saan sumisirit
Ang lamig ng walang pakundangang ulan. 

Nakatitig ako sa screen, naghihintay ng apoy 
O anomang ‘sang salita. Alas dos na’t 
napundi na ang bumbilya. 
Nadarama ko na 
ang ginaw ng madaling-araw.