Tagana

Kinakarawat ta ini nga takna hin karibhong
nga may lahid hin paglaum
ngan pag-usisa ha mga milagro 
ngan maldisyon nga kaya buháton ngan buhatón
hiton aton mga tudlo.
An tawag ta hini burublig, pintakasi,
an tawag nira hini pag-alsa.
Mátuod ka yana, waray labi nga makaharadlok
kundi an panulay nga nagsusulsol
ha kolektibo nga agurok
ha burokratiko nga kagutom.

Mabalik an tarhug ngadi ha aton,
ngan kitá labi nga maggigihinatagay uyon ha katigayunan,
maggigisinarigay labaw kay kinahanglan.

Presisyon

Kitaa ini nga balá,
nahimugso ha henyo nga mga tudlo,
kalkulado, malinis, antes
hiag-an ha amon plebeyo nga dughan,
nagsusumbong hin abunda nga ihap hin mga lawas
nga nagbuhi hin kadanggaban
ha atubángan han hinawid ngan lipóng nga mga santos.

Pananglitan, may sumat la an nag-uusig nga ayam
mahitúngod ha urusahon nga mga sapatos.
Ginhuhukman kami hiton magsiok nga mga dalan
ngan mga taran-awon nga tinalikdan han am mga bintana.
May mga bahín an panimalay nga diri kilala
han kabataan. Tubtob nga hisabuhan kami
hadton pino an pamati: an pulbos ba adto
kun an panimaho nam?
Dinhi namon nasukol an distansiya han pulbura
kay masayon la maigô iton waray ngaran,
súgad ha ira.

Diri Katgutom

Hibubut-ukan ngani ak hini nga haros-sinimsiman,
haros-sagmáwon niya nga saru-salakot nga sustansiya
hin mga butod ngan lab-as nga unod ngan tul-an,
ugbos ngan sipil hin utanón nga yinam-iran,
sindo bumangil ha pamulong kinikilala han ngipon, kinakarawat
han dila. Kundi waray magdadalunót nga salamat
ha akon malangsa nga im-im ngan simod.
Di man la nagsusuol an ira tiyan ha pagkinita ha akon
maldesido nga diyeta. An ibá nga runós, nauyon
ha iya sangguwinaryo nga kaluoy. 

                                                      Andam ako
makasala, unta, ha pagbungkag han hura nga kusina.
Waray man ngani ak makigsasaro ha iya kopa.
Waray man ngani ak humampang ha iya lamesa.