Orland Agustin Solis is currently pursuing a BA in Literature at the University of the Philippines Visayas. His writing has appeared in Nonrequired Reading in the Time of COVID-19 (Volumes 2 and 3) from Kasingkasing Press and in Talinghaga ng Lupa: Mga Tula from Gantala Press.
Agua De Mayo
Nagtubod ang kalangitan nga abo
naghaplak sa nagabagtik nga litik sang duta
ginsuyop, ginhigop sang nagapanagitlon
ba-il nga gina-uhaw.
Naglagtik, nag-agsik sa nagabaga-baga nga bato.
Nag-aso, nagbugnaw, nabanhaw
ang kayami nga nagapamukaw
sa mga sapat-sapat nga nagapanago sa iya buho.
Naghawan ang kalangitan,
naghupa ang nagadaba-daba nga kainit;
nabanhaw ang urok sang mga paka
nga nagapaliwa-liwa sa talamnan.
Nagdu-aw na ang nahauna nga ulan sang Mayo.
Nag-ilig na sa mga dahon ang mapagros nga tinulo
kag nadagdag sa kinahon sang humayan.
Buas, magabaliskad ang mga ba-il
kag magatubo ang bulong sang mga gutom.
Panghayhay Lamang
Panghayhay ang sabat sang maluya nga mamumugon samtang nagahawá-hawá ang pagginhawa agud ang agalon makakaon. Panghayhay ang pagbato sa mga pasalig sang agalon nga matam-is pa sa duga sang ginapas-an nga tubo. Panghayhay ang balos sa nagarinagu-ok nga tiyan samtang ginabayaw ang garab pakadto sa anihan.