Mark P. Bonabon is a paragsiday, a poet writing in the Waray language. He is a college instructor at the University of Eastern Philippines in Catarman, Northern Samar. He was a fellow at the Lamiraw Creative Writing Workshop, Iligan National Writers Workshop, Palihang LIRA, Palihang Rogelio Sicat, and the KRITIKA La Salle National Workshop on Art and Cultural Criticism. His work has appeared in Liwayway and Philippines Graphic. He is a member of Linangan sa Imahen, Retorika, at Anyo (LIRA).
Samaron an sigad nga iya ginbibinaktas, Sugad man san mga guramoy san iya mga siki Nga gin-iinistaran yana san kagaw san tubig-uran. Igbabaligya niya sa tabo sa bungto an duha kabulig nga saging Nga bagaw san iya puto, mga guramoy san higante. Kundi kay mahamis ini nga mga guramoy, Diri sugad san sa iya, nga baga'n mga kinibkiban san kabog Nga makadanay nahibuburong pagsulod sa ira payag Nga baga'n naghahanap sin mahahapunan nga sanga Sa ira agay-ayon nga barakilan, Ngan baga'n naghahanap sin masisirungan nga kadahunan Sa ira hururipan nga atop. Nahuna-huna niya – Bisan man daw kamanampan, Namimiling man gihap san katalwasan, san kahimyang. Harani na gihap siya sa bungto, Kay nababatian na niya an karasikas san mga sarakyan, Ngan an baga'n huni nga ribhong san mga paralitan. Harani na gud man siya, pira na la kapiktaw. Kundi kay tigda nga hinadlat an iya mga rapadapa, Ngan makuri na itindog, ipiktaw san iya mga siki. Dayon niya ginbutang sa sigad an ulay Nga sab-itan san kanan higante mga guramoy, Ngan ginsiplat an iya lugaring nga mga guramoy – Nanhuhubag, baga'n mga guramoy na san huruhigante; Nagdudurugo, baga'n kinibkiban san kabog; Nagrarangrang, baga-baga'n ngaran san ira dapit.