Si Joshua Mari B. Lumbera ay nakatira sa Cabuyao, Laguna. Nagtapos sa kursong BS Psychology (cum laude) sa Pamantasan ng Cabuyao. Kasalukuyan siyang nagtuturo bilang Assistant Instructor sa Our Lady of Fatima University – Laguna Campus. Siya rin ang Filipino Editor ng Novice Magazine.
Ráya
Para kay Eda
Katulad ng gabing dumakot ang talukap ng dilim sa palahaw ng bulalakaw, isinilang ang unang alitaptap sa sanga ng ambrosya sa aming bakuran, ganito ka rin dumating noon sa mundo, pumunit ako ng bahaghari sa katatapos na ulan, isang bagay na ang kapalit ay ang aking gunita kung paano kalimutan ang magtampisaw sa ulan at tumanghod sa kawalan sapagkat akay kita sa aking bisig, kimkim ang hiwaga ng langit.
Pilat sa Balintataw
Para kay Pauline
Patibong ang lahat ng gabi laging pipiliin ng mundo ang bangin ng mapayapang himbing ngunit sa dalagang ina, ang mga katiting na panaginip habang hele ang naalimpungatang anak ay pilat sa balintataw na walang hapding liwanag o dilim.
Ang Salamin ni Lola
Para kay Pilang
Sakramental ang kristal Sa tuwing tumitingin Nang hindi napupuwing, Eternal na lagusan Sa iyong pagninilay Ang hiwaga ng mata. Nananampalataya Ang gunita ng wangis Sa lirip ng salamin. Tanging gintong silahis Ng araw ang nagdilig Sa natatanging binhi. Sumibol ang bulaklak Na hindi nalalanta, Ang puso ng diwata.