Jetrho Monares, or grey, is a Waray poet and fictionist from Tacloban City. He currently resides in Pasay City, where he is training to become an air traffic management officer with the Civil Aviation Authority of the Philippines. His short story "Huring" was anthologized in Our Memory of Water: Words After Haiyan, edited by Merlie M. Alunan. He was a fellow at the 14th Lamiraw Creative Writing Workshop and the 22nd Iligan National Writers' Workshop. His work is forthcoming in an anthology of Waray fiction written by young writers.
kuris-kuris
kakuri gud ada maging tanom ha masitera. tutubigan pero diri sakto o sobra. papasirakan, mapasupasuan o tuman la. danay, diri pa gud asya it’ tuna. buhi ka samtang nagtitikamatay. kay kalaay man liwat hin waray kolor ha balay. kinaiya gud man liwat nat’ umiliw hin igkasi buhi. bibilngon gud nat’ it’ bis’ ano nga hinumdoman nga diri kita nag-uusaan. ha at’ kahalot, tanan nadudunot ha kahuot hit’ gunit hit’ at’ kamot.
tiunan-o mag-ampo
para ha akon sangkay ha kabubkiran
sugad ito han imo video nga ginpakita: ha kabubkiran nga waray ngaran, tatahuban hit’ burong it’ imo pangitaan agud kumuyupos it’ imo kalibutan ha napulo ka pitad. kun makain ka man o kun diin nagtikang, waray na nat’ labot kay waray kalibutan ha gawas hit’ burong. waray kasiguradoan nga may tuna ka pa nga tatamakan pero napitad, natamak, napadayon. diri na tuna an tatamakan. diri na pangitaan an tatapuran.
makuri sabton it’ dagko nga mga butang
kay diri na ini nasusukol hit’ aton dangaw. ano kahitaas it’ hataas? kun tawo, dida kun maul-ol na paghangad. kun building, dida hin natatahuban na it’ langit. tapos labaw pa an kahataas han langit ha langit. ano kahaluag it’ haluag? kun ha balay, it’ maigo tanan ha pamilya, kutob ha mga apo. kun ha kalarakan, nagtitikahaluag pa man ini. tapos an kabug-osan han tanan baga la hin tapotapo ha Imo. tiunan-o ko man sasabton it’ Imo gugma nga durudako, huruhaluag ha utlanan han tanan nga sukol? ano nga surudlan an masadang pagsalod han naglalalapwas? diin ko ilulugar an waray mabubutangan? waray gad. waray gud. napakiana ako kay kilala ko it’ kasisidman nga naghahadi ha akon kasingkasing. maluru-lamrag pa it’ gabi nga waray bulan, tapos amo pa gud it’ Imo gin-aaro? sige gad. Imo na iton. rabnuta pa ha ak’ dughan. suriti an kagaw, kuhaa tanan nga maghugaw. liwani hin buhi nga dugo. magmamalimpyo la ito kun waray na ako kay puro na Ikaw.