Carla Faith M. Aquino holds a degree in Political Science from the University of the Philippines and is currently pursuing her Juris Doctor at the University of San Agustin College of Law. Her work has appeared in 17 Halin sa Iraya and The Firmament and she was a fellow of the 2023 San Agustin Writers Workshop. A passionate youth leader from Antique, she draws inspiration from her Kinaray-a heritage.
Garab
Oktubre. Kaagahun. Napintahan kang dalag Ang mga latagun. Mga lagtum nga daw hilamon Nga buta kang uyas Sa paghuyup kang hangin Naga hapay-hapay. Daw bulawan nga nagaidlak Kon masirakan kang adlaw Ang kada pasi. Nagapamaypay. Nagapang-agda. Dayon dakup kang pulo Nga human sa inutod Nga sanga kang pinili nga kahoy. Ginhurma nga karaptan Agud ang tarum May sang-itan, kag Dali makatipon. Nagapamaypay. Nagapang-agda. Nga gutrabun agud may anihun Kag ipagaling hay darawatun Agud pag-uli sa balay may tirig-angun.
Rosal
Mayo run liwan. Amat-amat nga nanaringsing Ang nanarisari nga kabulakan sa amun hardin. Sa paglaaw ko sa bintana Una ko natalupangdan Ang pagpamukadkad Kang rosal. Bulawan ang tunga Nga ginapalibutan kang rabong Nga mga sipad nga puti Angay kang gugma mo nga putli. “Sa masunod nga pagpamulak, ako magabalik.” Mga tinaga nga imo ginbuy-an Sa paghawi mo kang akun buhok Kag pagbutang sa akun talinga Kang rosal nga imo gin puksi. Nagapangamyon. Daw baratyagun ko Kon may dapug, kang pagduut Kang imo mamara nga bibig Sa akun ginabalhas nga dahi. Pira run man gali ka bulan Halin kang ikaw nanakayun. Palangga, uli run! Kay kon daad adlaw-adlaw Nagapamukad Indi man daad ako paghidlawun.