apat ka binalaybay sa baraha

Alas

Kon tinutuyo mo nga matul-id  
ang dagway sang Dios Makaako,  
sa paghiram sang santo rosaryo 
indi ako magpasalig. Ilabi na gid  
sa pagluhod-luhod sa mayami 
nga salog sang hulot pangadian ukon  
sa paghimutad sa pinanid sang balaan  
nga kasulatan. Sa pagbinag-binag, 
usoya ang dalan padulong sa lamatyan.  
Kag didto maglingkod sa kanto sang latuk  
nga pusoyan. Balasaha, itagtag, pintaha,  
ang baraha. Kag sa mation-tion samtang  
nagakalaging imo mamulalongan: 
Alas ang Ginoo nga ginatuohan.  

Labaw sa gahum sang korona apang 
nahamtang sa ubos sang pinakakubos. 
Ang una nga amo man ulihi,  
ang sugod nga paghinapos.

Isipay Buho

Kay nagdiga. 
            Kay nagbátò. 

Nag-isipay. 
Isa-gatos ang búhò. 

Isa, duha, tatlo, 
            apat, lima, anum, pito… 

Apang wala sang namayad. 
Ang siyete siyentos namano. 

Kay liwat nga nag-isip 
nga ang baraha nagakulob: 

Isa, duha, tatlo,  
            apat, lima, anum, pito… 

Ang buho  
sa lawas sang namago nga nagtinguha  
malagyo.

Solitaryo

Balasaha ika-pito, 
Agud ang baraha 
Masamo maayo. 

Dayon ihutik sa hangin 
Ang imo ginapangabay 
Ang imo petisyon, tinutuyo. 

Ikatad ang baraha, 
Pito ka kubay sa lamesa 
Kag magsugod tagtag 

Sántò sa tudlo 
Sang mga mal-am. 
Padayon tubtub  

Mabahin-bahin mo  
Ang mga duag kag bulak, 
Hari gikan alas. 

Makamutik ang baraha 
Kon ginadaya, gani 
Kon indi makalampuwas, 

Ginhawa, himusa kag  
Magbalasa antes 
Magsugod liwan. 

Kay indi pagsalig 
Sa buenas ukon malas, 
Kondi pagpadayon, 

Pagpadayon, 
Ang kinaadman  
Nga sa aton ginaaman.

Pagsulondan sa Pagbangka

Una, pito ka sulit
Ang id-id nga balasa. 

Ikaduha, magpanagtagtag 
Sa imo pirme una. 

Ikatlo, paulihi kalaging,  
Pakulba ang imo baraha.

Ikaapat, inanay 
Kon magpinta. 

Ikaanum, magtuki  
Sang bahig indi paggulpiha. 

Ikapito, tuluka ang lungon. 
Angay sang kamatayon, 

Walay ginatuman 
Nga pagsulondan 

Ang baraha.