hindi makaakyat ang mama sa ikaanim na palapag
may bala sa kanyang hita at dugo
sa bibig

kung ang bibig ay bansang hiniwa ang ugat at ang dugo’y maharlikang nayon

ngayon nangangapa sa patay-sinding ilaw
habang pinupukpok ang ulo ng panibagong pasakit. 

hindi makaakyat ang bata sa ikaanim na palapag dahil pinintahan siya ng pula
ng amang gumagawa ng pera

            mula sa kamay ng bagong heneral
            mula sa bibig ng kalansay

tatahol ang kayang tumahol at luluha ang lahat ng pinilasan ng karapatang magsalita. 

bata ka pa pero kaya mo na
bata ka pa pero kaya mo nang

            paapuyin ang bituka para isuka ang
            pinipilit nila. 

bata ka pa pero kaya mo na
bata ka pa pero

            kaya mong amuyin ang sangsang ng
            ikaanim na palapag; hindi mo nais

malaman kung paano sila tumingin sa baba dahil

bata ka pa

            at may mga hagdan na sinusunog
            para gumawa ng panibagong bansa. 

bata ka
bata ka ngunit hindi bata
bata para kalasin
ang lumang tanikala
bata para alamin ang
bata para sa bansa.