Isang aktibista at manunulat sa Hiligaynon, Kinaray-a at Filipino si Adrian Medina Pregonir mula sa Banga, South Cotabato. Siya ay tumanggap ng pagkilala mula sa Gawad Bienvenido Lumbera, Don Carlos Palanca Memorial Awards, Gawad Rene O. Villanueva at Bantugan sa Panulatan Kinaray-a. Ang kaniyang mga akda ay lumitaw sa Dx Machina 4, Liwayway, Luna: A Journal of New Filipino Writing, Kabisdak at iba pa. Ipinalabas niya ngayong taon ang kaniyang zine na koleksiyon ng mga tula sa Kinaray-a na Wara it Mas Marahalun sa Pagdumdum, Totoy.
Ulan
ginbun-ag sang kagab-ihon ang pagpamatbat:
nagapalangudog nga nagsungka ang hutik
sang ugsaran nga nagpanaksi sang tuhay
nga tun-og kag ulan, daw pisu nga nagahuroy.
nagabadlak ang bulan sang manipis nga kasanag
sa mga busay padulong sa mga libtong sang Lake Sebu,
nagapusnga ang panganod sa gintaipan sang maalabaab
nga dupoydupoy. Ugaling, nagaulan niyan sa tunga
sang kagab-ihon nga wala sing bungog.
daw sa dungganon nga bisita ang nag-abot, ginbuksan
ko ang bintana kag gintamay sia, apang nagapanagu
sa hutik sang mga tinulo. Nagaulan, sa ugsaran, sa gwa
sang bintana, kon sa diin nakatanom ang akon kasingkasing,
nagapalangudog nga nagatamay
sa nagaulan na nga balatyagon.
Rolly
Sa atop nagdinumuganay ang mga kuring kag ilaga, napun-an sang karos kag gupi tungod sa nagkadol nga mga kamot, kagat, kuko. Gindugangan pa sang napulo ka maisog nga idu, nagapalanginit, samtang ginagurisnay ang ila balahibo sang makusog nga hangin, kag sang tuhay nga kaakig sang mga panganod. Wala nakapiyong ang amon mata yadto nga kagab-ihon, naganguyngoy kami samtang nagalugdang ang amon lawas sa tubi, tungod gintapan sini ang tanan nga mga panimalay. Kag sang nagmala ang kaduyogan, kasubong kami sang kuring nga bag-ong bun-ag, basa, nagapalangurog.
Humbak
Indi lang kalalawran ang maisog kag makamamatay nga puod ang akon nakilal-an, tungod sarang mabuhat sang kagulangan nga mangin dagat ang patag nga puloy-an. Ginhanot sang kilat ang amon mga buli nga magkinarankaran sa pagdalagan padulong sa mga pukatod. Daw tambor ni Piping Daguhob ang daguob nga nagparagaak sang amon nga mga bubong. Makaluluoy ang mga unga nga nagapungko, nagadas-ok sa duha ka butkon agod punggan ang kalamig, nagasiniyagit sang tabang tungod ang atop nga nangin bangka amat-amat nga nagalugdang. Nadalus-os ang paglaom nga makabutwa sa baha sang makangilil-ad nga hitabo samtang ang mga babayi nagapamalikas bitbit ang estatwa sang Santo Nino ang Hesus Nazareno. Nagpanaksi ang mga puod sang ginapalanganinawan, matuod nga tanan napatda sa humbak sang hangin, sa sidu sang pagkabalaka, kasubo.