Ika an silensyong bulos
Sa mabub’was pa sana
Tigdidistrungkar na sang oras. 

Sabi sang iba, 
Sadin ka man mag-ugpa, 
An tagdo mabugsok man gilayon sa daga. 

An kabo’tan mo yading bubon, 
Kami nagsasarok kina
Sa kapreskuan, nagluludop. 

Ababaw ka man sana
Pero indi palan nasusukol
Ning mata an rarom sang butnga. 

Tigsagop man ngani ninda
Para kuno maaraman
Para kuno maadalan. 

Alagad minakupsit, minatabsik
Minakigrit, ika man lugod
Tigsuka an payo-payong ba!

Ika na baga an sulong na yadi. 
Sinda an mga ragpa, 
Kami sa saymong mga libtong

Wara katapusang nagsasaldok
Ning rarom sa lubog mong
Lawas na dating sagurong.